සිංහල අම්මලාගේ ඉන්ටනැසොනල් දරුවෝ….!

ඊයේ පොඩි ගමනක් ගිහිං ‍, ටිකක් හවස් වෙලා මං ගෙදර යමින් ගමන්. ලාවට වගේ වැස්ස නිසාත් තව මගේ අතේ පොඩි බඩු වගයක් තිබුන නිසාත් නිදහසේ වාඩි වෙලා යන්න කියලා හිතාගෙන නැග්ගා පානදුර – කළුතර බස් එකකට.  දන්නෝ දනිත් එව්වයේ වේගය… පැයට මීටර් වලින් තමා ගමන.

ඉතිං ඔහොම ටික වෙලාවක් බස් එකේ යද්දී තල්පිටිය හරියෙන් නැග්ගා රේන් කෝට් දාගෙන වැස්සේ තෙමුනු පොඩි කෙලි පැට්ටෙක්. මූනෙ පුංචි පුංචි වතුර බිංදු පිරිලා. බස් එකේ ලයිට් වල එලියට ගෝල්ඩ් ඩස්ට් ගාලා වගේ දිලිසෙනවා. පස්සේ ඉතිං කොහොමහරි අම්මයි දූයි ඇවිල්ලා වාඩි වුනේ මට පිටිපස්සේ සීට් එකේ. මෙන්න ටික වෙලාවකින් කෙල්ල පටං ගත්තා එයාගේ ඉංග්‍රිසි පන්තිය…

මුලින්ම ඒයි, බීයි, සී, ඩී, ඊඊ, එෆ්. ජී වලින් පටන් අරගෙන එක අකුරක් වත් වරද්දන්නේ නැතුව ඉසෙඩ් අකුරු වෙනකම්ම කිව්වා… ඒකත් නිකං අර වයසක උන්දලාගේ දත් තියෙනවා වගේ ඕනෙවට එපාවට නෙමේ මාර ලස්සනට තාලෙට. කාට උනත් අහං ඉන්න හිතෙන ලස්සනට. එහෙම දෙතුන් පාරක් එකම සිංදුව දෙතුන් පාරක් කියලා ඉවර වෙලා අයෙ පටන් ගත්තා වෙන එකක්…

සන්ඩේ….. මොන්ඩේ…. ටූස් සේ…. වෙන්ස් ඩේ…. කියලා සතියේ දවස් හතම සිංදුවක් වගේ තාලෙට කියාගෙන යනවා. මට අනිත් පැත්ත හැරිලා කට දිහා බලාගෙන ඉන්න තිබ්බනම් ඒ තරම් අගෙයි…. පස්සේ ඉතිං මගක් හරියෙන් කෙලි පොඩ්ඩ බැහැලා ගියා. පස්සේ තමා මගේ ටියුබ් ලයිට් එකේ ඉට්ටාටරේ ගැහි ගැහී තිබිලා එක පාරට පත්තු වුනේ. අනේ හැබෑට අපේ පොඩි එකෙකුට කිව්වොත් සිංහල භාෂාවේ අකුරු ටික පිළිවෙලට කියන්න කියලා…. කීදෙනෙක් කියයි කියලද හිතන්නේ….???

මං කියන්නේ එක පොඩි එකෙක්වත් සිංහල හෝඩිය නෙමේ සිංහල භාෂාවේ අකුරු කීයක් තියෙනවද කියලවත් දන්නේ නෑ. ඒ තියා සිංහල මාස ක්‍රමයට අනුව දුරුතු, නවම්, මැදින්, බක්, වෙසක් වත් දන්නේ නෑ….

මොකද අපේ අම්මලා තාත්තලාට ලොකු වෙලා තියෙන්නේ අපේ භාෂාව නෙමේනේ… සුද්දන්ගේ ලොකු එක. අනේ ඉතිං ස්කෝලේ ඇරිච්ච ගමන් ‍පොඩි එව්වෝ දුවනවා ඉංග්‍රිසි පන්ති. ඇත්තටම අපේ රටේ අයට අනිත් දේවල් ගැන කෙසේ වෙතත් අපේ භාෂාව ගැනවත් කිසිම කැක්කුමක් නෑ. කොයි තරම් කියෙවුවත් මගේ අම්මටයි තාත්තටයි වුනත් ඕනේ කලේ මට ඉංග්‍රිසි උගන්නන්න. අපි කතා කරන සිංහල භාෂාව බල්ලට දාලා ඉංග්‍රිසි පන්ති නම් කීයකට මංම විතරක් ගියාද…. නිකං විහිළුවටවත් පුතේ උඹව අපි සිංහල පන්තියකට දාන්න කියලා තීරනය කලා කියලා, කියලා තියේද මේ වෙනකං. නෑ…. කවදාවත් එහෙම කියලා නෑ… මොකද අපි ඉතිං සිංහල කතා කරන්න හොඳට දන්නවනේ… අම්මගෙන් පටන් අරගෙන තාත්තගෙ පස්ස පැත්තෙන් ඉවර කරන තරමට අපි දැනුවත් වෙන්නේ ස්කෝලේ හය හත විතර වෙද්දිනේ. එහෙව් එකේ අපිට මොන සිංහලද… කොටින්ම අපේ දෙමවුපියෝ දකින විදියට අපි හෙන සිංහල පොරවල්… ඒ වුනාට තව දුරටත් ඉගෙන ගන්නේ ඉංග්‍රිසි…. ඉංග්‍රිසි භාෂාව පහත් කරනවා නෙමෙයි මේ… ඒත් ඉංග්‍රිසි ඉගෙන ගන්න කලින් අපේ රටේ භාෂාව ඉගෙන ගෙන හිටියොත් නරකද කියලා මටත් හිතුනේ මේ පොඩි එකාගේ සීන් එකෙන් පස්සේ.

අපේ අම්මලාට කලින් හිටිය දෙමව්පියෝ වගේම ඊට පස්සේ අම්මලා තාත්තලා වෙච්ච අයටත් තියෙන්නේ තමන්ගේ දරුවන්ට ඉංග්‍රිසි උගන්වන මානසිකත්වය. ඒකෙ වැරැද්දක් නෑ…. ඒත් තමන්ගේ පොඩි එවුන්ව ඉංග්‍රිසි උගන්නලා පොෂ් කරනවා වගේම, සිංහලත් ලෙසට උගන්නලා ටැලන්ට්‍ඩ් කරොත් නරකද කියන ප්‍රශ්නේ ම‍ගේ මේ මොහොතේ කැකෑරෙනවා. මොකද ටැලන්ටඩ් කියන්නේ ඉතිං සාමාන්‍යයෙන් යම් අමාරු දෙයක් කෙරෙහි හෝ සාමාන්‍ය දෙයක් කෙරෙහි හෝ අන් අයට වඩා යම් තරමකින් ඉහල දැනුමක් ඇතුව වැජඹෙනවා කියන තේරුම වගේනේ. ඉතිං ඉංග්‍රීසි වලට වඩා සාරවත්, අමාරු, පොෂ් විදියට කියනවනම් ඇඩ්වාන්ස් ලැන්ග්වේජ් එක තව චුට්ටක් වැඩියෙන් ඉගැන්නුවොත් නරකද මන්දා… ඔය ජපානේ, චීනේ, කොරියාවේ එහෙම දැන් කොම්පූටර් වල වැඩ කරන්නෙත් ඒ අයගේ භාෂාවෙන්ම කියනවනේ… අනේ මන්දා ඉතිං අපේ හැදෙන එවුන්ට භාෂාවේ තියෙන අකුරු ගානවත් නොදැන ඉංග්‍රීයේ තියෙන අකුරු විසිහය එහෙට මෙහෙට ක‍රකව කරකව කියන වචන එක්ක සිංහල කියන භාෂාව තව කොයි කාලයක් පවතියිද කියන එක.

දැන් ඉතිං සමහරු නම් මට බැන ගෙන බැන ගෙන යයි, මූට මොලේ නරක් වෙලා කියලා. අනේ කමක් නෑ… එහෙම හරි කාගෙ හරි මොලේකට මේ ටික කියවල රිදුනනම් ඒකත් ලොකු දෙයක් මටනම්… මොකද මේක ලියලා තියෙන්නෙත් සිංහලෙන්නේ… අනික මං නම් දන්නවා නූතන භාවිතයේ පවතින සිංහල හෝඩියේ තියෙන අකුරු ගානවත්….! ඒක දන්නෙ නැති කී දෙනෙක් මේ සිංහල බ්ලොග් කියවනවා ඇතිද නේද…?

අනිත් එක ඉතිං, පොඩි අයට අකුරු කියවද්දි විතරක් මොකටද සිංහල හෝඩිය කියවන්නේ ඒකටත් ඉංග්‍රිසි පොතක්ම ගත්තනම් ඉවරයිනේ…!

Advertisements

75 Responses to “සිංහල අම්මලාගේ ඉන්ටනැසොනල් දරුවෝ….!”

  1. Gimhani Says:

    මේකනම් සහතික ඇත්ත මාළු…

  2. kathandarakaraya Says:

    හේතුව තමයි අපි ඉංගිරිසි ඉගෙන ගන්නේ ඇල්ෆබට් එකේ පිළිවෙලට ඒෆෝ ඇපල් බී ෆෝ බැට්, සී ෆෝ කැට් කියලයි.

    අ-යන්න ලිව්වාට අකුරු කියෝන දවසේ අපි සිංහල ඉස්සෙල්ලා ඉගෙන ගන්නේ මයන්නයි ලයන්නයි මල කියලා නේද?

    ඊලඟට මහාප්‍රාණ අකුරු වලට එන්නේ වසර දෙකක් ගිහින්!

    • ගෝල්ඩ් fish Says:

      එහෙම කරලා හරි කමක් නෑ අය්යේ…. සිංහල හෝඩිය උගන්නනවා නම්…!!!

  3. maathalan Says:

    අපේ ජාතිය නිර්මණාත්මක ජාතියක් නෙමෙයි. නමුත් මේ සිංහළ යුනිකෝඩ් අදුන්වා දුන් අයට නම් මේ ආත්මෙම නිවන් දකින්න පුළුවන් වෙයි. අපේ හැම එකම සංකීර්ණයි තේරුම් ගන්න අමාරුයි. ජාතික කොඩිය බලපන්. මුළු රටේම කතාව කොඩියට දාලා. ජපානේ කොඩිය බලපන් සරළයි. අපේ ඉන්ට නිර්මාණාත්මක හෝඩියක් වත් හදා ගන්න බෑ. හේතුව ඒකයි.

    • පූසා Says:

      මාතලන් අයියාගේ අදහසට මම එකඟ නෑ. අපේ ජාතිය නිර්මාණාත්මක ජාතියක්. මේ වැඩසටහන පොඩ්ඩක් බලන්න මම මේ ලින්ක් එක දෙන්නේ පළවෙනි කොටසට. උවමනාවක් තියේනම් ඉතිරි කොටස් ටික වම් පැත්තේ තියෙනවා. මේ වැඩසටහන සම්පූර්ණයෙන් නැරඹුවොත් අපේ ජාතියේ නිර්මාණාත්මක භාවය සහ අපේ භාෂාව ගැන ගොඩක් දේවල් දැනගන්න පුළුවන් වෙයි.



      • ගෝල්ඩ් fish Says:

        තෑන්ක්ස් පූසා මේක ෂෙයාර් කලාට…

      • maathalan Says:

        තමන්ගේ දෙමව්පියන්ට රටට භාෂාවට ආදරය කරන්න ඕන කියන එකේ දෙකක් නෑ. නමුත් අපි පිළිගන්න ඕන ඔය මොන බයිලා ගැහුවත් අපිට මුකුත් බෑ කියලා. ඉන්දියාව මරාගෙන නිදහස ගත්තත් ඉංග්‍රිසියට තැන දුන්නා ඒ නිසා ඉංග්‍රිසීයෙන් ඉගෙනගත් ඉන්දියානුවෝ අද ලෝකෙම රජ කරනවා. 56 ආපු බූරූවා සිංහල රාජ්‍ය භාෂාව කරලා සාමාන්‍ය මිනිහට ළෝකයට යන්න තුබුන මාර්ගය වැහුවා. ඒ කාළකන්නියා කළේ ළොකු වරදක් කියල අද එයාගේ දුවම කියනවා. නමුත් එයා මොනවද කලේ 94-2005 වෙනකන්. දැන් ඉන්නවා කිසිම දෙයක් බැරි සිංහල විතරක් දන්න පොල් බූරුවෝ ටිකක් පොල් ටයි දාගෙන සිංහලෙන් ධනවාදිව හිතන්න කියන. එක්කො ජපානේ වගේ චීනේ වගේ කොපි කරලා හරි තමන්ගෙම දෙයක් හදාගෙන ඉදිරියට එන ඕන. නමුත් එහෙම එන්නේ නෑ කවදාවත්. සිංහලයෝ කියන්නේ මහා කම්මැලි ජාතියක්.

    • ගෝල්ඩ් fish Says:

      ඇඳේ හරි පැත්තෙන් නේද අයියේ බැස්සේ… වෙනදට වැඩිය වෙනස් විදියකටනේ බං මේ පාර හිතලා තියෙන්නේ…

    • ඉන්දික උපශාන්ත Says:

      උඹ හරි බං. ජාතික කොඩිය විතරද, ඇයි රාජ්‍ය ලාංඡනේ? පොළිසියෙ ධර්ම චක්‍රෙ? අපෙ උන් වගේ හිතුවනං ඉන්දියාවට පාළං කොඩියක් තමයි දාන්න වෙන්නෙ!

      • ගෝල්ඩ් fish Says:

        හික්….. ඒකත් ඇත්ත….

  4. මධුරංග Says:

    කතාව සහතික ඇත්ත අයියා.
    සිංහල ළමයෙක්ට ඉංගිරිසි බෑ කියලා කියලා කිව්වම ලැජ්ජාවක් නෑ. නමුත් සිංහල ළමයෙක්ට තමන්ගේ මවු භාෂාව වෙච්චි සිංහල හරියට කතා කරන්න බෑ කිව්වම වස ලැජ්ජාවයි නේ !!!
    අනික සිංහල අපට සිංහල භාෂාව තරම් හිතට කාවදින භාෂාවක් තියේද ? නෑ නේ 🙂

    • ගෝල්ඩ් fish Says:

      නිකමට හිතපං… අපි සිංහලෙන් තෝ, උඹ, උයා,, ඔයා… කියලා එක විදියට කියද්දි ඉංග්‍රිසියෙන් යූ…. ඌට ගැහුවත් බැන්නත් යූ ම තමා…

  5. Kasun Chanaka Says:

    දාන්න 5ක්….! සිරාම කතාව ඒක නම්.

    • ගෝල්ඩ් fish Says:

      1 2 3 4 5…. හික්….. කියෝලා හිතට ගනින් උඹේ පොඩි එව්න්ටවත් සිංහල හෝඩිය උගන්නන්න.

  6. Lahiru Says:

    කතාව නම් ඇත්ත, ඒ වුනත් ඒක නැතුව වැසිකිලියකට වත් යන්න බැරි විදියේ හෙට දවසක් තමයි උදාවෙමින් තියෙන්නේ අපේ රටේ, ඒකයි ඔහොම ට්‍රෙන්ඩ් එකක් යන්නේ!

  7. නිසුපා Says:

    නියම කතාව.කවුරු මොනවා කිව්වත් තමුන්ගෙ බාසාවෙන් හැර වෙන බාසාවකින් අපේ අදහස් හරියටම කියන්න බෑනෙ.මොකද අපි හිතන්නෙ අපේ බාසාවෙන්නෙ.හැබැයි දැන් ටික ටික කට්ටිය ඉන්ග්‍රීසියෙන් හිතන්න ගන්නවද මන්දා.

    • ගෝල්ඩ් fish Says:

      නිසූ මං නම් හිතන්නේ සිතුවිලි වලට භාෂාව වැදගත් නෑ කියලයි… මොකද සිතුවිල්ලක් කියන්නෙ බොහෝවිට රූප රාමුවක් වගේ දෙයක් නිසා.

  8. ~ChAnDiKa~~ Says:

    සිරා කතාව මාලු. Thumb up!! 😉

  9. සාබිත් Says:

    ඇත්තම කියන්න මං දන්නෙත් නෑ බං පිලිවලට!

    • ගෝල්ඩ් fish Says:

      උඹට කියන්න මාත් හොයාගෙන මතක තියාගත්තේ හෙන අමාරුවෙන්. ඉස්සර සිංහල පොතේ අච්චු ගහලා දුන්නට කවදාවත් අපිට ඒක පාඩම් කෙරෙව්වේ නෑ බං…

  10. Nimal Says:

    අප්පට සිරි!
    මං දන්නෙත් නෑනෙ…..නොදන්න බව දැනං හිටියෙත් නෑනෙ ඔය කියනකන්…..
    ඇත්ත ඒක අපට උගන්වපු විදිහේ වැරැද්ද තමයි. ගෙම්බත් පූසගෙ පැත්තෙ. මාතලන් දුකයි ආයි‍බෝං‍….සිංහල ජාතිය නිර්මාණශීලී ජාතියක් කියලනෙ ඉතිහාසෙ අපට පෙන්නල දුන්නෙ….

    • ගෝල්ඩ් fish Says:

      ඉගෙන ගනිං බොල… පහේ පන්තියේ සිංහල පොතක් අරං බලපං…

  11. Gayan Rupasinghe (සිංහයා) Says:

    කියන්න සන්තෝසයි මචන්… මට සිංහල හෝඩිය කට පාඩම්.. 10 වසරේ උගන්නපු ගැමි සර් ට පින් සිද්ද වෙන්න…

    ජය..

  12. රූ Says:

    මම නම් හිතන්නෙ අපි මේ සිංහල ඉංග්‍රීසි ගැන වාද කරලා වැඩක් නෑ.. ඒක හරියට පාරුව කරේතියාගෙන යනවා වගේ වැඩක්.
    හරියටම කියනවා නම් අපි සිංහල දෙමළ ඉංග්‍රීසි භාෂා 3ම දැන ගන්න ඕනි. නැත්නම් මේ රටේ සාර්ථක සන්නිවේදකයෙක් වෙන්න බෑ.
    සිංහල වචන වැරදුනාම ආඩම්බර වෙන්නත් ඉංග්‍රීසි වචන වැරදුනාම ලැජ්ජා වෙන එකත් මට නම් පෙන්න්න බැරි දෙයක්. අපි හැමෝම එකතුවුනොත් මේ ආකල්ප අනාගතයට යන එක නවත්වන්න බැරිවෙන්නෑ.

  13. ගෝල්ඩ් fish Says:

    දැන් ඒ ඉංග්‍රිසි සංකල්ප මුල් බැහැලා ඉවරයි අක්කේ… ඒ මුල් ගලවන්න නම් අර ඇවටා එකේ වගේ ගහ මුලටම නෙලන්න ඕනේ….

  14. X-Porter Says:

    ගෝල් පිස් කොලුව ඉඳල ඉඳල අල්ලගත්තෙ බර පතල ප්‍රශ්නයක්…

    අර කිව්ව වගේ අපෙ භාෂාව සාපේක්ෂව වර්ධනය කරගන්නෙනෑ….හේතු ගොඩක් අතරින් එකක් තමයි ලංකාවෙ විතරයි ඕක භාවිතා වෙන්නෙ…අනික මිනිසා භාෂාවල් හදා ගන්නෙ ඓතිහාසික අවශ්‍යතාවයේ එක් කොටසක් ලෙස. මිනිස් සම්බන්ධතා වර්ධනය වෙනකොට ඊට සාපේක්ෂව භාෂාත් වෙනස් වෙනව…භාෂා නැතිවෙනව නත්තං මළ භාෂා වෙනව අලුතින් ඇතිවෙනව . අද අම්මලාට තියෙන ප්‍රධාන ප්‍රශ්නෙ මේ තරඟ කාරී ලෝකෙ තමංගෙ ලමයගෙ අනාගතෙ සුරක්ශිත කරන්නෙ කොහොමද කියල….ඒ නිසා අම්මලට තාත්තලට බැනල හරියන්නෙනෑ… ඉගෙන ගත්ත සහ දැනුම් තේරුම් තියේන ඔයාල.. ඒ ගැන හදාරන එක තමයි වටින්නෙ…එහෙම නේද… යාලු මාලුවො…

    • ගෝල්ඩ් fish Says:

      සිංහල බ්ලොග් තියෙනකම් සිංහල මළ භාෂාවක් වෙන එකක් නම් නෑ…

  15. anonymous Says:

    Your idea is completely wrong. We cannot deal with new technologies , countries , cultures without ENGLISH. Your parents had understood that. But unfortunately you don’t . Sinhala is also important. But you think how limited it is. Yes of course it has thousands of words but can you speak it in an another country. Sinhala is endemic to us. But English is a global language. So what we have to do is learn Sinhala , Learn English better and make this country a beautiful , wonderful country.

    • ගෝල්ඩ් fish Says:

      හ්ම්… සිංහලයි ඉංග්‍රිසියි දෙකම කතා කරන දෙකම හරියට දන්නෙ නැති ලස්සන වොන්ඩර්ෆුල් රටක් බිහිවෙයි තමා මේ යන විදියට…. කවුරු වුනත් බොහොම ස්තුතියි මං හිතන දේට විරුද්ධවත් කරුණු දැක්වීමට.

  16. Observer Says:

    මන් ඉස්කෝලේ යන කාලේ සිංහල හෝඩියෙ තිබුනෙ අකුරු පනස් ගානයි, දැන් හැට ගානක් තියෙනව. සිංහල ඉස්සරහට යනව මිස මළ භාෂාවක් වෙන එකක් නෑ කියල හිතෙනව. ගූගලය වුනත් සිංහල පිළිඅරං තියෙනවනෙ අවශ්‍ය භාෂාවක් කියල.

    වයස 5 සහ 10 කාලෙ ඔස්ට්‍රේලියාවට ගෙනාපු මගෙ කෙල්ලො දෙන්න අවුරුදු 20 කටත් වඩා පස්සෙත් සිංහල කතා කරනවා හොඳට, පොඩි එකීට නං යාන්තමට ඇක්සන්ට් එකක් තියෙනව, ඒ වුනාට ලංකාවට ආපහු ගිහින් මිනිස්සුන්ට තේරෙන්න කතා කරලා වගකියයුතු රැකියාවක් කරන්න තරන් සිංහල හොඳයි.

    ලොකු එකීගේ දරුවටත් ඔබී සෑහෙන්න සිංහල උගන්නල තියෙන්නෙ, සුද්ද බෑණත් අපිට අම්ම තාත්ත කියන්න විතරක් නෙමේ පස්ස හෝද ගන්නත් ඉගෙනගෙන ඉන්නෙ.

    ඊට වඩා ඉහලට ගිය පවුලක් අපි දන්නව. දුව සුද්දෙක් බැඳ ගත්ත. ටික කාලෙකට පස්සෙ දෙන්නම මහණ වුනා, ඒ දුව භික්කුණී ආරාමෙ ‘උපේක්ෂා’ නමින්. සුද්ද බෑණ ‘බුද්ධරක්කිත’ නමින් භික්ෂු ආරාමෙ.

    මන් කියන්න හැදුවෙ මනුස්සයින්ගෙ සිංහළ පිළිබඳව තියෙන ආකල්පෙ උඩ හුඟාක් දේ රැඳිල තියෙන්නෙ කියල. මාළුවා කියපු දේ, හරියට හිතන්න ඕනේ දෙයක් ඇත්තටම.

    අපිට ලංකාවට ගියාම දකින්න ලැබෙන දෙයක් තමා, විශේෂෙන් ගෑනු ළමයි, බොරු තොදොල් ඇක්සන්ට් දාල සිංහළ කතා කරන එක ඉස්ටයිල් එකක් වෙලා. රේඩියෝ එකේ සහ සූපවාහිණියෙත් ඒ ගොන් පාර්ට් ඇහෙනව.

    • ගෝල්ඩ් fish Says:

      ඔබා මාමේ පොඩ්ඩක් බලන්නකෝ ලංකාවේ ටීවී චැනල් එකක් දිහා හරි එෆ්.එම් එකක් දිහා හරි…. එතෙන තියෙන්නේ අමුතුම ලැන්ග්වේජ් එකක්.

  17. X-Porter Says:

    @ ඔබා මමා :භාෂාවක් වර්ධනය වෙනව කියන්නෙ අකුරු ගාන වැඩි වෙන එකට නෙමයි. එහෙම බැලුවොත් 54 – 68 වෙලා 100 වෙලා…. මගෙ අම්මො මල කෙලියක් වෙනව..අඩු අකුරු ප්‍රමානයකින් සියලුම වචන ලියන්න පුලුවන් වීම තමයි වැදගත්. ඉංග්‍රීසියෙ අකුරු 24 තමයි මේ ඔක්කොම කරන්නෙ…කුමාරතුංඟ මුනිදාසල වගේ බුද්ධිමතුන් උත්සාහකලෙ ඒකට තමයි. ඒ කියන්නෙ අඩු අකුරුගානක් හදාගන්න. නමුත් හරිගියෙ නෑ..නෑ..නෙමයි එතනින් එහාට අපේ කවුරුත්උත්සාහ කලේනෑ. දියුනු භාෂා ලෙස සාමාන්යෙන් පිලිගන්නෙ අඩු සංකේත නැත්තං අකුරු සංඛ්‍යාවකින් වැඩි වචන ප්‍රමානයක් ලියන්න පුලුවං ඒව….මාලුව අල්ලගත්තෙ කොටිවලිගයක්….

    • ගෝල්ඩ් fish Says:

      අයියේ ඉංග්‍රිසි හෝඩියේ අකුරු දෙකක් අඩුවුන බවක් මට මතක නෑනේ…. //ඉංග්‍රීසියෙ අකුරු 24 තමයි මේ ඔක්කොම කරන්නෙ//

  18. X-Porter Says:

    සිංහලයේ අකුරු කීයද..? ස්වර 20 අං අහ් (බින්දු දෙක කොටන්න දන්නේනැත)එක්ක. ඒදෙක භාවිතාවේ නැත . එලු එලූ (කොටන්න නොදනී) අකුරු දෙකත් භාවිතයේ නැත. එතකොට භාවිතා කරන ස්වර 14 යි. ව්‍යංජන 40 යි ෆ සමග. තව අලුත් අකුරක් තියෙනව (zස) කියල. එතකොට 41 යි. ඔක්කොම භාවිතා කරන අකුරු 55 යි. භාවිතා කරන නොකරන ඔක්කොම 61. (ලඟක් වෙනකං ඔක්කොම 60 කියල මගෙ හිතෙ පිලිගත්තෙ). ඔන්න මං දන්නෙ ඔච්චරයි. අඩු පාඩු වැරදි පෙන්නා දෙන්න කියල ඉල්ලා සිටිනව. ඉතින් යකෝ අපිටත් මඤ්ඤං වෙන එකේ.. පොඩි එවුං කොහොම මතක තියාගන්නද….

    • ගෝල්ඩ් fish Says:

      මං ඉගෙන ගද්දී හා දැන් භාවිතයේ තියෙනවා අකුරු 64ක්…

      අහ් = අඃ
      එලු = සෘ
      එලූ = සෲ

      මේ ඔක්කොම යුනිකෝඩ් වලත් තියෙනවා….

  19. X-Porter Says:

    සමා වෙන්න ඔක්කොම 62 ඇයි අර ඉස්සර ලඩකා බැංකුවෙ ඩයන්න වගේ එක. ඒක මං හිතන්නෙ ස්වරයක්.

    • ගෝල්ඩ් fish Says:

      64 යි අයියේ… ඉංග්‍රිසි හෝඩියේ 26යි 🙂

  20. arunishapiro Says:

    ඉන්ටනැසනොල් අම්මලාගේ “සිංහල” දරුවො කියලා එකකුත් ලියන්න ඕනා යාළු මාළුවෝ!!! සිංහල කියවන්න, කතා කරන්න දන්න සුද්දො සුද්දියො, කැනේඩියානු, ඇමෙරිකානු ජාතික අය ඕන තරම් හමුවෙලා තියනවා. සමහරු ලංකාවේ සමාජ සේවයට ඇවිත් ගම්මානයක ජීවත්වෙලා භාෂාව ඉගෙන ගත්ත. තවත් අය වොෂිංටන්වල දී රාජ්‍ය සේවය සඳහා භාෂාව ඉගෙන ගත්ත. ඇමෙරිකන් එම්බසියෙ කල්චරල් ඔෆිසර් හිටපු කාන්තාවක් එහෙම ඇමෙරිකාවේ දී සිංහල ඉගෙන ගෙන තමයි ලංකාවේ වසර 2 ක සේවයට ආවේ.

    ඕනා කමක් ඇතිවෙන්න නම් ඉගෙන ගන්නා දේකින් ප්‍රායෝගිකව පාවිච්චි කරන්න අවස්ථාවක් තියෙන්න ඕන. නැත්නම් ඉගෙන ගන්නෙ විභාගය පාස් කරන්න විතරයි!! කැඩිච්ච සිංහලෙන් හෝ කැඩිච්ච ඉංග්‍රීසියෙන් වැඩ කරගන්න පුළුවන් කියල හිතන කෙනාට එතැනින් එහාට යන්න ඕනැ කමක් නැහැ.

    • ගෝල්ඩ් fish Says:

      අක්කා කියන දේ හරි…. ඒත් අක්කේ අපේ දේ හරියට ඉගෙන ගෙන ඊට පස්සේ අනිත් අයගේ එව්වා ඉගෙන ගත්තොත් හොඳයි කියලා තමා මං නම් හිතන්නේ….

      • arunishapiro Says:

        යාළු මාළු මල්ලියේ, අපේ දේ හරියට ඉගෙන ගන්න ඇති උවමනාව ඇතිවෙන්නේ කොහොම ද? යමක් කරන්න කියූ පමණින් එය කරන්න හිතෙන්නේ නෑනේ. එයින් ලැබෙන යම් වාසියක් තියනවා නම් ඒ සඳහා උවමනාවක් ඇති වෙනවා. අපේ දේ හරියට ඉගෙන ගන්න උවමනාවක් ඇති කරන්නේ කොහොම ද? අපි එහෙම උවමනාවක් ඇති කරන්න උත්සාහයක් නොගෙන “අපේ දේ හරියට ඉගෙන ගන්නවා නම් හොඳයි” කිව්වාට එයින් කිසිම ඵලයක් නැහැ.

        දැන් මම ලියන බ්ලොග් එක දිහා බලන්න. මම හැකි තරම් උත්සාහ ගන්නෙ ඉංග්‍රීසියෙන් ප්‍රතිචාර දාන අයවත් සිංහලෙන් ප්‍රතිචාර දාන්න එකතු කරගන්න. මම ලියනවාට වඩා සරලව ලියන්න යැයි කියන අය වෙනුවෙන් සරල ව ලියන්න උත්සාහ ගනිමින් ඒත් සිංහල කියවන අයට නුහුරු සිංහල වචන එකතු කරන එක නවතන්නෙ නැහැ. මම බ්ලොග් ලියන නිසා සිංහලෙන් නොකියවන අය බොහොමයක් නැවත සිංහලෙන් කියවන්න පටන් ගෙන ඇති බව මට එහෙම පටන් ගත්ත අය කියා ඇති නිසා මා දන්නා කාරණයක්.

        සිංහල නිවැරදි භාවිතයට සහ සිංහල භාෂාවෙන් කතාබහට අපි උවමනාවක් ඇති කළ යුතුයි. එවිට ඊට යොමු වෙන ඉබේම වෙනවා.

      • ගෝල්ඩ් fish Says:

        අක්කාගෙ කතාව ඇත්ත… මම ඒකෙ කිසිම දේකට විරුද්ධ නැහැ. ඒත් අක්කේ අපේ මිනිස්සුන්ගේ හිත් වල එහෙම කියවන්න තියෙන ආසාව වැඩි කරන්න ඕනේ බ්ලොග් ලියන අපිවත්, පත්තර වල ලියන අයවත් නෙවෙයි, අම්මලා තාත්තලා, ගුරුවරු…!!!

  21. හිතුමතේtio Says:

    මාලු යාලුවා උඩ දාලා තියන එකෙත් අකුරු අඩුයි නේද ? මට මතකය හරිනම් අපි අනිතිමට පාඩම් කරනකොට අං වලින් තමයි ඉවර කලේ…

    කාලේට ගැලපෙන වැදගත් පොස්ට් එකක්…. මගේ මතකය නිවැරදිනම් මාලු යාලුවා පන්සලේ දහම් පාසල් බාර් එකක් නිසා වහපු කථාවෙන් පස්සේ මෙහෙම පොස්ට් එකක් දැම්මේ මේක..

    හිතුමතේට නම් හොඩිය කියන්න පුලුවන්.. මොකද ගියේ පුන්චි ස්කෝලෙට… ඒ කාලේ ස්කෝලේ ඉංග්‍රිසි ගුරුවරයෙක් උන්නෙත් නැ.. පන්ති යන්න වියදම් කරන්න සල්ලි තිබුනෙත් නැ (එවා ගැන බ්ලොග් එකේ තියනවා ඔන්න)

    එත් අද තරමක් ඉංග්‍රිසි පුලුවන්… ඒක තැනට ඕන හැටියට .. කොහේ ගියත් මගේ මව්බස අංක 1

    • ගෝල්ඩ් fish Says:

      උඩ තියෙන එක මං ගත්තේ නෙට් එකෙන්. සිංහල පොතක් හොයාගන්න බැරිවුනා මට.

      ඇත්ත ඉංග්‍රිසි පාවිච්චි කරන්න ඕනේ අවශ්‍ය තැනට විතරයි. නැත්තං අර දැලි පිහියක් හොයාගත්ත වඳුරා වගේ වෙනවා…

  22. X-Porter Says:

    සමාවෙන්න මල්ලි ඔබ හරි..මම වැරදියි… ඉංග්‍රීසි 26.. නමුත් මට මතක හැටියට සිංහල භාවිතා වන අකුරු 54 යි. මට මතක හැටියට. මේ කුනුහබ්බ රටේ ඉඳල ඒවත් අමතක වෙලාද කොහෙද.. කොහේ හිටියත් තමංගෙ මවු භාෂාව අමතක කිරීම හෙනගහන වරදක්…මම ඔයගොල්ලොත් එක්ක මේ ඉන්නෙ පැය 12 වැඩකරන ගමං… ඒනිසා ගොඩක් වෙලාවට කල්පනා කරන්න වෙලාවක් නෑ. එනිසා තමයි මම ඔය ගොල්ලංගෙ බ්ලොග් වලට ආස… ඔය ගොල්ලො අපේ නැතිඋන ජීවිතය අපිට ගෙනත්දෙනව.. ඒකට ගොඩක් පින්. මේක ලියන කොට වෙලාව මෙහේ වෙලාව 00.30.

    • ගෝල්ඩ් fish Says:

      හරි හරි අයියේ… ඒක පොඩි අත්වැරදීමක් විතරයිනේ. දැන් නම් සිංහල හෝඩියේ අකුරු 64ක් තියෙනවා… කියන්න බෑ ඉතිං ආණ්ඩු මාරුවෙද්දී විෂය නිර්දේෂ මාරු වෙනවා, ඒ ගමන් ඉතිං සිංහල හෝඩියත් එහා මෙහා වෙනවා ඇති…!!!

  23. ඕනයා (දුලිප් සිකුරාජපති) Says:

    ඕ . . . ෂිට් . . . .!!!

    • ගෝල්ඩ් fish Says:

      මොකෝ…. 😛

      • ඕනයා (දුලිප් සිකුරාජපති) Says:

        ඒ . . තොට ඒක තේරෙන්නෙත් නෑ . . . . . ඒක තමයි ගස් වැද්දො දැං ඉන්න පොෂ් කොල්ලො කෙල්ලො වැඩියෙංම වගේ හදිසියට පාවිච්චි කරන වදං සැට් එක . . . .

      • ගෝල්ඩ් fish Says:

        හරි හරි ඉතිං 40 පැන්නට අයියත් කොල්ල වගේ කියලා සිංහලෙන් කිව්වනම් ඉවරයිනේ… ඌඌඌ… ෂීට් ගාන්නේ නැතුව…!!! 🙂

  24. ඔබ නොදු‍ටු ලොවක් Says:

    ඉංගිරිසි බැරුව ටොයිලට් එකකටවත් යන්න බෑනේ මචෝ……

    • ගෝල්ඩ් fish Says:

      ඒකත් ඇත්ත… කක්කුස්සිය. වැසිකිලිය කියලා දැන් කොහෙවත් ගහලා නෑනේ… හැමතැනම තියෙන්නේ toilet කියලනේ…

      • ඕනයා (Dulip Sikurajapathy) Says:

        අඩේ . . එහෙම කියන්න එපා . . . උඹලට අපිට නැති උනාට . . මහතුවට තාම වෙංකරපු එවුව්ව තියනව . . සිංහලෙංම ගහල . . . බලපං ඊලඟ වතාවෙ කෝච්චි ඉස්ටේසමට ගියාම “මහතුන්ගේ වැසිකිලිය” කියල ගහල නැද්ද කියල

  25. Kawshala Kapila Kumara Says:

    “හේතුව තමයි අපි ඉංගිරිසි ඉගෙන ගන්නේ ඇල්ෆබට් එකේ පිළිවෙලට ඒෆෝ ඇපල් බී ෆෝ බැට්, සී ෆෝ කැට් කියලයි.”

    English “D” for Donkey…………….

  26. නවම් Says:

    මූට බාසාව ගැන ලිව්වත් කෙල්ලෙක් ගැන නොලියා ඉන්න බැරි හැටි.

    භාෂාවක මූලික පර්මාර්ථය අදහස් හුවමාරු කරගැනීම නං ඕක මොකක් උනාම මොකෝ බං. කියන උලව්ව තේරුං ගන්න පුළුවන් උනානම් ඒ මදෑ. ඕකට වෙන වෙන සක්ක ගහල සරුව පිත්තල එල්ලන්න ගිහිල මරාගන්නෙ මොටෝ.

  27. පිණිබිඳු Says:

    ඉස්සර ඉස්කෝලෙ සිංහල පාඩමේදි අපෙන් නම් හෝඩිය පාඩම් ගත්තා.

    • ගෝල්ඩ් fish Says:

      අපේ නම් ඉතිං ඒ දවස් වල ඉඳන්ම ඉංග්‍රිසි විතරයි… කියලා වැඩක් නෑ….

  28. චතූ Says:

    //සිංහල වචන වැරදුනාම ආඩම්බර වෙන්නත් ඉංග්‍රීසි වචන වැරදුනාම ලැජ්ජා වෙන එකත් මට නම් පෙන්න්න බැරි දෙයක්.//

    ඔන්න ඔබ ටික කියලා පටන් ගන්නා ඕනේ… ඇත්තටම තමන්ගේ මවු භාෂාව නොදැනීම සිංහලයෙකුට ආඩම්බරයකට කාරණාවක් වුනේ කොහොමද මන්දා ? ඇත්ත… අපි මහ කම්මැලි ජාතියක්… ඒකට හේතුව අපේ gene pool එක හද්දා කවලමක් වුනු හින්දා (කොරපු හින්දා ???) වෙන්නැති. මේ වගේ මාතෘකාවක් කථා කරන්න වත් කොන්ද පණ තියෙන සිංහලයෝ නෑ නොවැ… ඒ අතින් නම් මාළුවා ගැන සෑහෙන්න ආඩම්බරයි…

    මං පොඩි යෝජනාවක් කරන්න කැමතියි. සිංහල භාෂාවට ආදාරය කරන, අපේ භාෂාව රැකගත යුතුයි කියන අදහසේ ඉන්න… නිකම්ම කටින් නෙවෙයි, ක්‍රියාවෙන්ම වැඩට බහින්න පුළුවන් ආකලප තියෙන මේ සයිබර් අවකාශයේ කට්ටිය එකතුවෙලා ‘සුරකිමු සිංහල‘ වගේ Group එකක් හදාගත්තොත් මොකද ?

    උඹේ උත්සාහයට මගේ ප්‍රණාමය !!! කට ගාපු භාෂාවට දශමෙකින් හරි යුතුකම ඉටුකලා කියලා සතුටු වෙයන් මචං… උඹට සහ අපිට ජය !!!

    • ගෝල්ඩ් fish Says:

      ගෲප් එකක් නැතත් තමන්ගේ මතේ දිගටම ඉන්න පුළුවන් පිට කොන්ද තියෙන අය ඉන්නවනම් සිංහල තව දුරටත් රැකේවි. හැබැයි සිංහල බ්ලොග් තියෙනකං නම් සිංහල මළ භාෂාවක් වෙන්නේ නෑ… ඒ වගේම දැනට මං හිතන්නේ ජාත්‍යන්තරයට සිංහල වැඩියෙන්ම යන විදිය බ්ලොග් වෙන්න ඕනේ….!

  29. Observer Says:

    බී.යූ.ටී. බට්, ඒ වුනාට පී. යූ. ටී. පුට්.

  30. praveena Says:

    මූනු පොතේ ‘පොඩි කුමාරිහාමි’ කෙනෙක් ඉන්නවා කියලා හැමෝම මගෙන් අහලා එවලා තියනවා ඒ මමද කියලා. අනේ මම නම් මූනු පොතේ නෑ හොඳේ. ඒ වෙන පොඩි කුමාරිහාමි කෙනෙක්. පොඩ්ඩි නම් නෙමේ…ඊලඟට තව කොහෙන් හරි ප්‍රවීනා පලිපාන කෙනෙකුත් එයිද දන්නේ නෑ. අනේ ඕං මම නම් නෙමේ.

    • ගෝල්ඩ් fish Says:

      හැබෑට මොනා කරනවද මූන හංගගෙන… n.i.q.a ෆේස් බුක්…..!!!

  31. pissa palaamalla Says:

    සිංහල උනිකෝඩ හඳුවල දීපු ගොයියන්ටනම් පින් සිද්ද වෙන්න ඕනි….

  32. කළු පූසා Says:

    ඇත්තම කියනවා නම් මටත් නම් සිංහල හෝඩිය පිළිවෙලට කියන්න බැහැ.

    දෙයියනේ කියල මේ සිංහල type කරන්නෙත් සිංග්ලිෂ් වලින් Google Translation IME Software එකට පින්සිද්දවෙන්න

  33. ටකරන් ආතා Says:

    ඔය ඉතින් සමාජේ හැටිනේ.. මෙතන මේක විකාරයක් වෙලා තියෙන්නේ අපේ සමහර අය අර සිරාවට පොශ් එවුන්ටත් වැඩිය පොශ් වෙන්න යන එක.. english ඉගෙන ගන්න එක ගොඩක් හොදයි. මොකද අද ජොබ් එකක් කරනකොට වගෙම ගොඩක් ඩිප්ලොමා අනම් මනම් හැම දෙකදිම english උනේ වෙනවා. ඒ වගෙම තමන්ට හරියට english බැරි දෙමව්පියෝ තමන්ගේ ලමයින්ට හරි හොදට උගන්න වෙහෙසෙනවා. එක හොදයි.අනිත් එක තමයි english කියන්නේ international language එකක්. ඉතින් ඒක දැනන් ඉන්න එක ගොඩක් ප්‍රයොජනවත්..

    මම කලින් කිව්වා වගේ වැරද්ද තියෙන්නේ අර බලෙන් පොශ් වෙන් පිරිසගේ..ඒ අය තමයි english බැරි නම් ගනන් ගන්නේ නැති උන්ට හිනා වෙන අපහාසයට ලක් කරන සමාජයක් හදලා තියෙන්නේ.. ඉතින් එහෙම බලද්දි අර තම්න්ගේ පොඩි එකාට english ටිකක් බලෙන් හරි පොවන්න බලන අම්මලාට වැරද්දක් කියන්නත් බෑ..මොකද අද සමාජෙ ඉන්න උන්ගෙන් 70% විතරම ඉන්නේ බලෙන් පොශ් වෙන්න දගලන බුවලනේ.

    මම නම් කියන්නේ සින්හල english දෙකම හොදට ඉගෙන ගනිල්ලා.. තව මොකක් හරි ආසා language එකක් තියෙනවනම් එකත් ඉගෙන ගනිල්ලා..

  34. mppgunasinghe Says:

    ඔබ පවසන්නේ අවධානය යොමු වියයුතු සත්‍ය්‍යක් ඇත්තම කියනව නම් අදවත් මට සිංහල හෝඩිය අනුපිළවෙලට කියාගන්න අමාරුයි. සිංහල ශබ්දකෝෂය හෝ විශ්ව කෝෂය කියවන්න යන විට මේ නිසා නාස්තිවෙන කාලය අපරාදෙ


ලිපිය ගැන අදහස්...

Fill in your details below or click an icon to log in:

WordPress.com Logo

ඔබ අදහස් දක්වන්නේ ඔබේ WordPress.com ගිණුම හරහා ය. පිට වන්න / වෙනස් කරන්න )

Twitter picture

ඔබ අදහස් දක්වන්නේ ඔබේ Twitter ගිණුම හරහා ය. පිට වන්න / වෙනස් කරන්න )

Facebook photo

ඔබ අදහස් දක්වන්නේ ඔබේ Facebook ගිණුම හරහා ය. පිට වන්න / වෙනස් කරන්න )

Google+ photo

ඔබ අදහස් දක්වන්නේ ඔබේ Google+ ගිණුම හරහා ය. පිට වන්න / වෙනස් කරන්න )

%d bloggers like this: