පඹයෙක් නිසා වෙච්චි දෙයක්…

ම්……… නහය කඩාගෙන මොලය වෙනකම්ම දුවන කැලෑ ගස් ගඳ. මම නැගිට්ටේ දැන් වුනාට මට කලින් තව කීදෙනෙක් නම් නැගිටලද…? පාන්දර තුනේ විතර ඉඳන් එක එක කුරුල්ලෝ සැරින් සැරේට ඇහැරෙනවා… කොහොම හරි පහ පහමාර විතර වෙද්දී හැමදාමත් වගේ ළඟපාත තියෙන ඒත් ඈත…. ගහක ඉඳන් කොහෙක් කෑගහනවා. ඒ එලාම් එක තමා මගේ නැගිටීමේ එලාම් එක. අනේ මන්දා ඌත් එලාම් වදින ඔරලෝසුවක්වත් උස්සං ගිහින්ද කියලා… මොනා වුනත් ඉතිං මහ ‍ලොකු වීරයා  ඔය කොහා කෑමොර දෙන්නේ අනුන්ගේ කූඩුවක ඉඳගෙනනේ….

ඊට පස්සේ ඉතිං ඇඳන් පැනලා දුවන්නේ කුස්සියට. අම්ම හදල දෙන කිරි එක බොන්න. ඔන්න ඊට පස්සේ වෙනදා වගේ ඔෆිස් නොයා ඊයේ ගියා කලින් දා හවස දැක්ක පඹයා බලන්න. සත්තයි… මං පඹයෙක් දැක්කේ අවුරුදු ගානකින්. මං කිව්වේ කුඹුරක ආරක්ෂාවට හිටවලා ඉන්න පඹයෙක්ව. එහෙම නැතුව හුස්ම ගන්න පඹයෙක්ව නෙවෙයි. එවුන් නං ඉතිං ඕනේ තරං ඉන්නවනේ. (මේ ඉන්නේ මං දැක්ක පඹ ආරක්ෂකයා ….)

ඉතිං ඔය කුඹුරක පඹයෙක් හිටවන්නේ ඒ කුඹුරේ වී වපුරලා‍‍‍… සාර්ථක වැස්සක් හෙම ලැබිලා ගොයම් ගස් පීදිගෙන එන දවස් වලට. ඒ කියන්නේ පුංචි පුංචි ලා කොල පාට ගොයම් ගස් හිමීට ලොකු වෙලා…. හුරතලේට එහෙට මෙහෙට වැනෙන හුලඟත් එක්ක හරි හරි යට හැප්පිලා, ගොයම් ගස් වල පලදාව නැත්තං ගොයම් කරල් මතුවී ගෙන කාලෙට. ඇත්තටම බිත්තර වී වපුරලා ගොයම් පැල වලින් ගොයම් කරල් පීදෙනවා කියන්නේ හරියට පුංචි ගෑණු ළමයෙක් මල්වර වෙනවා වගේම දෙයක්. ඒ දවස් වලට ඉතිං ගොවියෝ ගෙවිලියෝ මුළු කාලෙම යොදවන්නේ තමන්ගේ වටිනා කියන වස්තුව රැක බලාගන්න. හරියටම අර පුංචි දැරිවිගේ අම්මලා තාත්තලා පුංචි කෙල්ලව ආදරෙන් ගෙට කරලා බලාගන්නවා වගේ.

ඊට පස්සේ ඔන්න ගොයම් පැල ටික ටිකෙන් ටිකෙන් ටික ලොකුවී ගෙන එනවා. ගොයම් කරල් ලස්සනට පිරිලා… වී කරල් බිමට බරවෙන්නේ, අර කෙලි පොඩිත්තගේ රෑප සොබාව මතුකරගෙන කොන්ඩ කරල් තුනටිය හරියට දික් වෙලා එහෙට මෙහෙට පැද්දෙනවා වගේමයි… ඔය දවස් වලට පුංචි කෙලීගේ ආරස්සාවට ගෙදර කවුරුහරි හැම තිස්සෙම පස්සෙන් යනවා එනවා වගේම තමා  එහෙ මෙහෙ යන කුරුල්ලන්ගෙන් කුඹුර ආරක්ෂා කරගන්න පඹයෙක් ඉන්දන්නේ…

ඉතිං සමහර වෙලාවට කෙලි පොඩ්ඩ ටික ටික ලොකු වේගෙන එද්දී අම්මයි තාත්තයි දෙන්නම එයත් එක්ක ඉන්නවා වගේ තමා, කුඹුරේ ඉන්දපු පඹයට අමතරව තව ලණු ඇදලා ගොක් අතු, රෙදි පටි එහෙම කුඹුර වටේට එල්ලන්නේ. ඒ හැමදෙයක්ම කරන්නේ ගොවියන්ට ගෙවිලියන්ට තියෙන එකම වස්තුව කුඹුර නිසා.

ඊට පස්සේ ඉතිං ගොයම් ටික සරුවට හැදිලා රත්තරං පාට වෙනකම්ම ඒ කුඹුර ගොවි දෙමහල්ලෝ රැක ගන්නේ අර පුංචි කුමාරි ටික ටික ලොකු වෙලා ගුණධර්ම වලින් පිරිපුන් වෙලා, අධ්‍යාපනයෙන් පෝසත් වෙනකං රැක ගන්නවා වගේ තමා. ඒ අතරෙදි කුඹුර ගැන හැම තිස්සෙම හොයලා බලලා නියමිත වෙලාවට වතුර ටික කුඹුරට ලබාදීලා… කෘමිනාෂක ඉහලා පොහොර දාලා කුඹුර වෙනුවෙන් කරන්න ඕනේ හැම දෙයක්ම කරන්නේ ඒ කුඹුරෙන් ලැබෙන සාර්ථක අස්වන්න ගොවියන්ගේ එකම බලාපොරොත්තුව නිසයි. හරියට අර පුංචි කෙල්ල ‍ස්කෝලේ යද්දී පොත්, පෑන්, පැන්සල් අරං දීලා බඩගිනි වෙලාවට ආහාර සපයල කිසිම දුකක් නොදී රැක ගන්නෙත් එහෙම්මයි. එතනින් එහාට ඉතිං නැකැත් එහෙම බලලා අවට ගොවියෝ එක්කත් කතා කරලා අස්වනු නෙලන්න දිනයක් යොදාගන්නේ… අර කෙලීව දීග දෙන්න හොඳ තැනකින් කටයුත්තක් කතා කරනවා වගේම තමා‍. ඊට පස්සේ ඉතිං කරන්න කොයිතරම් වැඩ තියෙනවද…? ගෝනි එකතු කරන්න ඕනේ… දෑකැති මුවහත් කරන්න ඕනේ, කට්ටිය සුදානම් කරගන්න ඕනේ, එදා නැකතට උයන්න කට්ටිය හොයා ගන්න ඕනේ…. දෙයියනේ කීයක් කියලා වැඩද…? අර කෙලීගේ දෙමව්පියෝ ඒකිව දීගදෙන මගුලට ලක ලෑස්ති වෙනවා ඇත්තෙත් මෙහෙම්ම තමා.

ඊට පස්සේ ඉතිං අර යොදාගත්ත දිනේට කැවුම් කිරිබත් උයලා කට්ටියම එකතු වෙලා දෑකැති අරගෙන කුඹුරට බැහැලා ගොයම් නෙලනවා. ඊට පස්සේ ඉතිං වී ගොඩ එක තැනකට එකතු කරගෙන රෑ වෙනකං සාජ්ජ දාන්නේ අර දැරිවි ලොකු ළමයෙක් උනදා ඉඳන් ආදරෙන් පරිස්සම් කරලා කලවයස ආවම සුදුසු, ගැලපෙන පිරිමියෙක්ට භාරදෙන සතුට බෙදාගන්න වගේම නේද…?

ඊට පස්සේ ඉතිං වී හුලං කරලා, බැත ඉවත් කරලා එහෙම වී ටික ගෝනි වලට අහුරලා සතුට බෙදාගන්න ගමන්ම ඊළඟ දවසේ මුදලාලි එනකං පැත්තකට කරලා තියන්නේ… අළුත් මනමාලයා… මනමාලිව, එයාගේ ගෙදරට කැන්දන් යන්න හදනවා වගේ කියලයි මටනම් හිතෙන්නේ…

%d bloggers like this: